九宮畫境 私隱政策

最後更新：2026-10-31

「九宮畫境」係一個數獨遊戲：每解完一題，棋盤會慢慢透出一幅公共領域名畫。遊戲唔使登入（只有全球排行榜要你自己揀用 Google Play 遊戲登入），題目同名畫全部內置，唔使上網都玩到。

資料儲存

• 遊戲進度、星數、每日挑戰紀錄、解題回放、成就、統計同設定，全部只儲存喺你部手機。我哋冇伺服器，亦唔會收集個人資料。
• 移除 App 就會刪除晒所有資料。

分享同桌布

• 分享：只有你撳「分享」嗰陣，App 先會將圖片交畀你揀嘅 App（例如 WhatsApp）；我哋唔會收到。
• 挑戰朋友：只有你撳「挑戰朋友」嗰陣，App 先會將一條連結交畀你揀嘅 App。連結 # 後面嘅挑戰碼只有題目設定同你嘅用時、提示同錯誤次數，冇名、冇電話、冇任何個人資料；挑戰碼唔會傳去伺服器，只喺朋友部機入面打開。中轉頁放喺 GitHub Pages，GitHub 會好似一般網站咁記錄存取紀錄（例如 IP 位址）。
• 設做桌布：只有你喺名畫館撳「設做桌布」嗰陣，App 先會用手機嘅桌布功能（權限：SET_WALLPAPER）換桌布。App 唔會讀取你現有嘅桌布或者相簿。

全球排行榜（Google Play 遊戲）

全球排行榜係可選功能：只有你喺排行榜頁撳「Play 遊戲登入」之後，App 先會喺你完成每日挑戰或者無限名畫之後，將成績（用時、題數、最長連勝同每日挑戰嘅日子標籤）上傳去 Google Play 遊戲服務。排行榜會顯示你嘅 Play 遊戲玩家名稱同頭像。呢啲資料由 Google 處理，我哋冇伺服器，亦收唔到你嘅電郵。詳情請睇 https://policies.google.com/privacy；你可以喺 Google Play 遊戲 App 嘅設定刪除你嘅遊戲資料。

請開發者飲杯嘢同永久去廣告（應用程式內購買）

你可以自願透過 Google Play 內購畀小額支持，或者一次過買「永久去廣告」。付款由 Google Play 處理，我哋收唔到你嘅信用卡資料。飲杯嘢唔會解鎖任何功能。

廣告

本 App 用 Google AdMob 顯示橫額廣告（首頁、地圖、技巧圖鑑、每日挑戰頁）、過關後嘅插頁廣告（大約每過 3 題先有一次、最少相隔 4 分鐘，玩緊題目期間唔會出現）、高螢幕手機喺解題頁底部嘅一張原生廣告卡（每 60 秒換一次，禪模式冇），同埋你自己揀睇嘅獎勵廣告（換提示）。AdMob 可能會收集裝置廣告 ID、由 IP 推算嘅大概位置、廣告互動同診斷數據，用嚟顯示同衡量廣告。詳情請睇 https://policies.google.com/technologies/ads。你可以喺手機「設定 › Google › 廣告」重設或者刪除廣告 ID。

為咗控制廣告，App 會讀取一個公開嘅遠端設定（Firebase），決定係咪顯示廣告同埋要唔要更新，過程唔會傳送任何用戶資料。App 亦會喺手機本機讀取首次安裝日期：喺設定日期之前已經安裝（例如測試期間）嘅手機唔會顯示廣告；呢個日期只喺手機入面用，唔會上傳。

名畫同素材

App 入面嘅名畫來自博物館開放存取（公共領域／CC0），音效同字體係 CC0／OFL 授權。

年齡

本 App 唔係專為兒童而設。

聯絡

如果對私隱有疑問，請電郵 bc.braydencheung@gmail.com。

Android 套件名稱：com.soren.sudoku_gallery